Amaia Ballesteros

Amaia Ballesteros Lopez 1978 urtean Trapagaranen jaiotako diseinatzaile grafikoa, ilustratzailea eta komikigilea da. Madriden Diseinu eta Komunikazio Multimediako Masterra egin zuen eta Bilbon Arte Plastikoetako eta Diseinuko Teknikari ikasketak egin zituen, Publizitate Diseinu Grafikoaren alorrean.

Bere webgunean kontatzen duenez, bederatzi urtez publizitate-agentzietan, editorialetan eta arte grafikoen enpresetan lanean aritu ondoren, bere kabuz hasi zen lanean eta estudioa sortu zuen. Kartel eta komiki lehiaketetan sari ugari eskuratu ditu.

Publizitate eta ilustrazio lan ugari egin ditu eta komikigintzan aritzen da: Saure etxerako egindako proiektuak, erakundeen kanpainetarako sortutako komikiak, Gobernuz kanpoko elkarteentzat, fanzineetarako... Xabiroi eta Gaur 8-n argitaratzen ditu komikiak ere.

1994 urtean Portugalete Uri Urena Komiki-Lehiaketan 15 urte azpikoen kategorian akzesita irabazi zuen, eta helduen kategorian 2010. urtea bitarte guztira zazpi sari jaso ditu: 1. eta 3. sariak edizio banatan eta 5 aldiz euskarazko sari onenaren akzesita

2002ko Ermuako Komikiaren III. astean “Cómic de Mujer” erakusketan parte hartu zuen, eta beste erakusketa kolektiboetan Bilbon eta Madrilen

2004ean 2. saria eskuratu zuen Saure Argitaletxeak antolatutako “Fábulas Medioambientales” Ilustrazio lehiaketan.

Bere lehen albuma beste autoreekin partekatua izan zen: 2005ean Saure etxeak Pulp Fikzioa komikia argitaratu zuen gazteleraz, katalanez eta euskaraz: Amaia Ballesterosek egin zuen albuma osatzen duten 4 komikietako bat.

2006ean Saure argitaletxeaen “Encuentros en la Orilla” erakusketan Amaia Ballesterosen komiki eta ilustrazioak egon ziren erakusgai.

Urte batzuetan jarraian beste zenbait sari ere irabazi zituen, besteren artean “Bizkaia Maitea” Ingurumeneko lehiaketan (2006, 2007 eta 2008 urteetan), 1. saria Sestaoko Ilustrazio Fantastikoen lehiaketan. (2005 eta 2009 urteetan)

2010ean Getxoko Komiki Azokan ikusgai egon zen "Escalera de color" Amaia Ballesterosen erakusketa.

2011 urtean Saure etxerako berriz ere Cartographica / Mapagilea komiki digitala sortu zuen.

Urte horretan hasi zen fanzineetan argitaratzen (Zócalo, Replika, Rumble!...) eta Xabiroi aldizkarian istorio bat argitaratu zuen Katixa Agirreren gidoiaz.

Wikipediaren arabera ilustratzaile lanak egin ditu hainbat liburuetarako, tartean "Izenaduba, baso magikoa" (Sua Edizioak/Izenaduba Basoa, 2011), "Kilimanjaroko diamantea (Ibaizabal Argitaletxea, 2013), Ijitoen Altxorra (Ibaizabal Argitaletxea, 2015), La Perla eta Mi aitite, un niño feliz Mª del Mar Montserrat Ruizekin, Zallako Baserria (Zallako Udala, 2019)...

2012 urtetik aurrera Eusko Jaurlaritzarentzat tratu txarren prebentzioari eta sare sozialen erabilerari buruzko komikiak sortu zituen.

2013an Rekalde-Ortzadar Komiki Lehiaketako finalista izan zen, eta bestalde Ganorabako lehiaketan epaimahaiko kide izan zen. Komikintza arloko sari ugari jaso ditu hainbat lekuetan antolatutako lehiaketetan: León, Cornellà de LLobregat, Senpere, Portugalete, Basauri, Zumarraga, Galdakao, Noja, Gasteiz… 2014 urtean lehen saria jaso zuen Ibarrako Galtzakomik VII Komiki Lehiaketa.

2015ean "Gernika, bakearen eta adiskidetzearen alde" komikia sortu zuen, Joseba Gómezen gidoiarekin. Urte berean Ekonomia Soziala gaitzat hartuta, Oletakorta komikia sortu zuen REAS Euskadirako.

2016ean «Ilustrazio digitalaren erronka berriak: sorkuntza, erabilera eta kontsumoa" hitzaldian hartu zuen parte, eta 2017an "Komikia eta gainerako abentura ilustratuak." solasaldian.

2019an "Euskaltzaindia, euskararen 100 urteko laguna" komikia argitaratu zuen, Juan Luis Zabalaren gidoiarekin.

Pinterest atarian bere komiki gehienen irudiak topatu daitezke

REASEuskadik 2020 urtean beste bi enkargu berri egin zizkion: otsailean argitaratu zen 'Kanpoaldean/A las afueras' komikia eta urrian 'Labirintoa' istorioa,  biak Albordefilms kolektiboaren gidoiaz.

Zoritxarrez soilik gazteleraz argitaratu zuen Saurek paperean 'Las sombras, los colores, misterios y monstruos de la humanidad' komiki bilduma: bertan paperean elkartu zituzten aurretik soilik digitalean argitaratutako Amaia Ballesterosen 'Mapagilea', Yurre Ugarte eta Joseba Larratxeren 'Katu Hegoduna" eta Pablo Zerda irudigileak Jansainekin egindako istorioak (Jean Paul Saure editoreak gidoigintzarako erabiltzen duen ezizena).

2022ko ekainaren 15ean Nabarralderen eskutik 'Amaiur. Gaztelu baltza' komikia aurkeztu zen Sabino Arana Fundazioaren egoitzan. Ale honen gidoiaz Angel Rekalde arduratu zen eta irudiak Amaia Ballesterosek sortu zituen.

Iñigo Astiz Berrian 'Nafarroako Termopiletako bataila' artikuluak idatzi zuen.

Gazteleraz Irrati elkarrizketa egin zieten Onda Vascan Angel Rekalde eta Amaia Ballesteroseri: Amaiaren hitzetan, behin dokumentazio eta gidoi lanak eginda, marrazketa 3-4 hilabeteko lana izan zen.

2023 urtean Arbasoak komikia argitaratu zuen Ballesterosek, Alboan elkartearen enkarguz sortutako lana.

• web orrialdea:http://amaiaballesteros.com/

• Bloga:http://amaia-ballesteros.blogspot.com/

EUSKARAZ ARGITARATUTAKO KOMIKIAK

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2023 02 OTSAILA	Arbasoak	ALBOAN	Amaia Ballesteros	Amaia Ballesteros	Edizio elebiduna	Etymon Solutions	2023 otsaila
2022 06 EKAINA	Amaiur: gaztelu baltza	Nabarralde / Sabino Arana Fundazioa	Angel Rekalde	Amaia Ballesteros	Bi edizio, euskaraz eta gazteleraz	?	2022, gazteleraz aldiberean
2020 10 URRIA	Labirintoa	Ekonomia Alternatibo eta Solidarioaren Sarea REAS / ALBOAN	Ana Serna / Marta Gómez / Paula Iglesias (Al Borde films)	Amaia Ballesteros	Edizio elebiduna	Belaxe, Koop. Elk.	2020ko urria
2020 02 OTSAILA	Kanpoaldean	Ekonomia Alternatibo eta Solidarioaren Sarea REAS	Ana Serna (Al Borde films)	Amaia Ballesteros	Edizio elebiduna	Itziar Orbegozo	2020ko Otsaila
2019 09 IRAILA	Euskaltzaindia, euskararen 100 urteko laguna	Euskaltzaindia	Juan Luis Zabala / Amaia Ballesteros	Amaia Ballesteros	Euskaraz Jatorrizkoa		2019ko Iraila
2015 10 URRIA	Oletakorta	Ekonomia Alternatibo eta Solidarioaren Sarea REAS/ALBOAN	Amaia Ballesteros	Amaia Ballesteros	Edizio elebiduna	Labayru Fundazioa	2015 urria
2015	Gernika, bakearen eta adiskidetzearen alde	Saure	Joseba Gómez	Amaia Ballesteros	Edizio elebiduna	Iñaxio Lopez de Arana Arrieta	2015

Euskarri digitalean

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2011	Mapagilea	Saure	Amaia Ballesteros	Amaia Ballesteros	Edizio elebiduna	Iñaxio Lopez de Arana Arrieta	2011

Beste autoreekin partekatutako komiki liburuak

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2005	Pulp fikzioa 4 komiki	Saure	Maria José Mosquera Beceiro / Aurora Solano / José Hierro Amaia Ballesteros/Maria Elena del Valle Garces /Diego Alejandro Garavano	Maria José Mosquera Beceiro / Amaia Ballesteros/Maria Elena del Valle Garces /Diego Alejandro Garavano	Jatorrizkoa gazteleraz	Virginia Perez Alonso	2005